samedi 30 juillet 2011

السّه السّه... 1... 2...

،أيّتها المواطنين، أيّتها المواطنات

أوّلا و قبل كلّ شيء، نحبّ نعتذر من توّا على المستوى الرّديء برشا في اللّغة العربيّة اللّي بش يعرضكم في الأرتيكل هذا... (و فرد مرّة خلّيني نعتذر زادا على الذّمار المقيّح اللّي بش يفاجئكم... أو  پا)ا

،أمّا بعد

بمناسبة حلول (على فرد وزن هي و كحول*) شهر رمضان المبارك (غريبة في هل البلاد، كلّ شيء مبارك: كان تحوّل راهو مبارك، كان ثورة راهي مباركة ـــ دوحي... ـــ، و كان سنية راهي مبارك!)، حبّيت نحيّي كافة أمّة محمّد و الأمّات الآخرين زادة (من غير حتّى دسكريميناسيون) و أقول لهم يعطيكم القوّة في هل سخانة و الكرفي و التّحشيش


نتمنّالكم زادة بش ما يولّيش عبد الفتّاح مورو هو سامي الفهري الجديد في ما يخصّ مونوپول مسلسلات رمضان، و أيضا بش ما تولّيش صلاة التّراويح الحدث هايپ** أو كذلك فرصة لل سپيد دايتينغ 

في ما يخصّ العازقينو (أو في رواية أخرى، الكفّار)، ما نجّم نقولكم كان ربّي (و إلّا غيرو، پيرسونيلمون، منعرفو كان فل تصاور) يصبّركم في ما يخصّ النّفاق اللّي بش يجهركم، خاصّة النّفاق الفايسبوكي: اللّي كان ينشر في مغامراتو مع البنات و الزّطلة و الشراب تحوّل إلى زهرة لمبوبة في زمانها (أمّا في عوض ما تلقّط الفلوس بعد كل تدويرة حزام، يلقّط الدعاء بعد كل تعليق ـــ و موش صبّاط ـــ فيه "استغفر الله")... و يلعب هو و أمثاله مسابقة "من سيربح 1000000 أجر" من هنا إلى آخر الشهر

بون، ماذابيّ نزيد نحكيلكم على برش حاجات أخرى، أمّا منخبّيش عليكم إلّي عينيّى تنقبت من هل كلاڢيَى اللّي بل عربي... و قبل ما نكمّل نحبّ نشكر ليخيلوعوس و جوجل ترانسلايت على وقفتهم معايا

...

و عاد إلى المنزل فرحا مسرورا


ا *دايور، على الفازة، أخي القارئ، تنجّم تستنتج اللّي الكحول هي الحلول و ليس المشكول (ضرورة شعريّة) ـــ مش'كول و اشرب (#هومور دو ميرد)ا 

ا **الحدث هايپ: لمّة ثقافيّة في شاطئ بلحمّامات الجنوبيّة، وين تلقى كمشة جماعة مخلّصة 30 دينار للدخول دون كونسوماسيون، لابسين زعمة زعمة هپّي و يشطحو على موزيكا هاوس... جانيس جوپلن راهي تندب 

10 commentaires:

  1. haha, 7loua ménnek, ya3tik saha et romdanek mabrouk

    RépondreSupprimer
  2. Aaychék :D Romdhanék mabrouk lella !

    RépondreSupprimer
  3. sinon, il y a yamli.com guellou clavier visuel

    RépondreSupprimer
  4. Non mais lexilogos mayeb3edch barcha aala yamli, mais merci quand même hein!

    RépondreSupprimer
  5. E! Romdhanek sa3id (voilà pur changer de elma5lou3 'moubarek' ) , tu ne fais pas une petite pensée el chaddedet elssaf dans les grandes surfaces ? non ? Bref barra chahiya tayba!

    RépondreSupprimer
  6. J'aurai bien voulu (mélli ichédd essaf qoddém el koucha lelli ichédd essaf qoddém baguette&baguette), mais faudra me payer l'ophtalmo après, moi et les claviers en arabe, c'est une histoire d'amour aveugle qui se finit mal !
    Et romdhanék romdhan ya Fléna ! :D

    RépondreSupprimer
  7. مشكورة على المجهوود، طلعت حتّى في لغة الضاد عندك ماتقول في روحك ! أمّا بالله ماتقولّيش حكاية الأجر متاع فايسبوك غالطة، عندي قدّاش ننشر ننشر ننشر و نحسب في الحسنات

    RépondreSupprimer
  8. كانك على الحسنات، قلّي قدّاش لمّيت، تو نقلّك وين بلاصتك بالضّبط في الفيل داتّنت متع الجنّة !

    RépondreSupprimer
  9. بارتاجيت تلاثة تصاور متاع مليار حسنة و حطّيت جام على زوز فيديوات متاع زليون حسنة أمّا ساعات نكحّل على تصاور كنزة الفوراتي

    RépondreSupprimer